बालकांचे जीवन… प्रशासनाची जबाबदारी – नंदुरबारच्या जिल्हाधिकाऱ्यांची संवेदनशीलतेने घेतलेली तात्काळ कृती

 बालकांचे जीवन… प्रशासनाची जबाबदारी – नंदुरबारच्या जिल्हाधिकाऱ्यांची संवेदनशीलतेने घेतलेली तात्काळ कृती

 डामरखेडा, नंदुरबार | २ जुलै 

नंदुरबार जिल्ह्यातील अतिदुर्गम भागातील शिक्षणासाठी धडपडणाऱ्या आदिवासी विद्यार्थ्यांच्या सुरक्षेची जबाबदारी केवळ पालकांपुरती मर्यादित नाही, तर संपूर्ण समाज आणि शासनाची आहे, हे जिल्हाधिकारी डॉ. मित्ताली सेठी यांनी आपल्या कृतीतून पुन्हा एकदा अधोरेखित केले.

आज डामरखेडा येथील गोमाई नदीवरील पुलाच्या बांधकामाच्या पाहणीदरम्यान, जिल्हाधिकाऱ्यांचे लक्ष एक बोलेरो पिकअप वाहनाकडे गेले. प्रथमदर्शनी हे वाहन मालवाहतुकीसाठी होते, पण वाहनात लहान मुले बसलेली दिसली आणि जिल्हाधिकारी मॅडम यांनी क्षणाचाही विलंब न करता वाहन थांबवले व चौकशी सुरू केली.

तपासणीतून समोर आलेली माहिती हृदयस्पर्शी होती – ही मुले अक्कलकुवा व अक्राणी तालुक्यातील दुर्गम आदिवासी भागातील असून, शाळेच्या सुटीनंतर नायडोंगरी (ता. नांदगाव) येथील अनुदानित आश्रमशाळेत परत जात होती. मात्र, सार्वजनिक वाहतूक व्यवस्थेच्या अभावामुळे आणि आर्थिक अडचणीमुळे त्यांना जीव धोक्यात घालून मालवाहू गाडीने प्रवास करावा लागत होता.

या निष्कलंक मुलांच्या डोळ्यांतील शिक्षणासाठीची जिद्द आणि आस पाहून जिल्हाधिकाऱ्यांनी तत्काळ निर्णय घेतला – शहादा एस.टी. आगार प्रमुखांशी संपर्क साधून मुलांसाठी खास बसची सोय केली आणि त्यांच्या सुरक्षित प्रवासाची जबाबदारी स्वतःच्या खांद्यावर घेतली.

त्याचवेळी, बोलेरो चालकाकडे विचारपूस केल्यावर वाहन चालविण्याचा परवाना नसल्याचे आढळले. त्यामुळे त्यांनी संबंधित यंत्रणेला कायदेशीर कारवाई करण्याचे निर्देश दिले.

ही घटना फक्त वाहतुकीची तपासणी नव्हती, तर संपूर्ण प्रशासनाची जबाबदारी आणि माणुसकीची ओळख होती.

जिल्हाधिकारी डॉ. मित्ताली सेठी यांची तत्परता, संवेदनशीलता आणि कृतीक्षम निर्णयक्षमता ही अशा प्रकारच्या घटनांमध्ये प्रशासनाची खरी ओळख ठरते. ही घटना केवळ त्यांच्या नेतृत्वाचा गौरव नाही, तर दुर्गम भागातील आदिवासी विद्यार्थ्यांसाठीच्या आशेची एक प्रेरक कहाणी आहे.

.

.

.

#Nandurbar #IASMittaliSethi #ChildSafety #TransformingGovernance #PublicService #TribalEducation #EducationForAll #SensitiveAdministration #NandurbarCollector